Jarðgöng í stað Mýrargötustokks

Útlit er fyrir að jarðgöng verður grafin undir Mýrargötu í stað stokksins sem áætlaður var í góðærinu. Efnt verður til hugmyndasamkeppni um allt gamla hafnarsvæðið og Örfirisey. Allir mega taka þátt, ekkert skilyrði er að vera drátthagur.

Hún er erfið fæðingin á uppbyggingu við gömlu höfnina. Í góðærinu var áætlað að byggja upp tónlistarhús, nýjar höfuðstöðvar Landsbankans, lúxushótel og viðskiptamiðstöð, stokk frá Geirsgötu út í Ánanaust og vorið 2007 var samþykkt skipulag fyrir slippa og ellingsen reitinn við Mýrargötu.

Tvö ár eru síðan íbúar í Vesturbænum gagnrýndu harðlega uppbygginguna og sögðust ekki vilja sjá gamaldagsblokkir í Austur-Evrópustíl á svæðinu.

Stokkahugmyndinni var frestað í vikunni sem bankaútrásin dó og í staðinn er nú íhugað að grafa jarðgöng undir Mýrargötuna, sem ku heldur ódýrari en stokkur og hafa þann kost að hægt er að byggja ofanjarðar og bíða með göngin þar til umferðarþunginn kallar á greiðari samgöngur. En nú á að nota kreppuna til að efna til nýrrar hugmyndasamkeppni fyrir allt hafnarsvæðið frá Tónlistarhúsi og út í Örfirisey. En af hverju ekki að nýta þær hugmyndir sem þegar hafa verið samþykktar í ljósi þess að til dæmis skipulagið við Mýrargötu var 3 ár í undirbúningi í kerfinu?

,,Við viljum ekki halda áfram slíkum bútasaum heldur frá betri sýn hvernig svæðið mun líta út í framtíðinni," segir Júlíus Vífill Ingvarsson, borgarfulltrúi Sjálfstæðisflokksins og stjórnarformaður Faxaflóahafna.

Júlíus segir að hugmyndasamkeppnin sé bæði fyrir fagfólk og almenning.

Úrslit hugmyndasamkeppninnar verða kunngjörð í haust.