Fundað á heimilum Geirs og Ingibjargar

Algjör óvissa ríkir um hvort ríkisstjórnin lifi út daginn og er talið allt eins líklegt að stjórnarslit verði áður en þessi sólarhringur er allur. Forystumenn stjórnarflokkanna áttu klukkustundarlangan fund á heimili Geirs H. Haarde forsætisráðherra í hádeginu um framhald samstarfsins.

Geir sagði við fréttamenn að loknum fundi að engin niðurstaða lægi fyrir og sagði óvíst að ríkisstjórnin héldi velli. Af svörum Ingibjargar Sólrúnar að fundi loknum varð heldur ekki ráðið hvað gerast muni á næstu klukkustundum. Talið er að samfylkingarmenn hafi lagt fyrir sjálfstæðismenn tillögur sem þeir óski svara við áður en dagur er kveldi kominn og að sjálfstæðismenn ræði nú viðbrögð við þeim.

Þorgerður Katrín Gunnarsdóttir og Geir hafa fundað frá því að fundinum með Ingibjörgu lauk. Andri Óttarsson, framkvæmdastjóri Sjálfstæðisflokksins, bættist í hópinn á þriðja tímanum.

Á meðan fundar Ingibjörg Sólrún á heimili sínu í Vesturbænum með Ágústi Ólafi Ágústssyni, Lúðvíki Bergvinssyni, Össuri Skarphéðinssyni og Skúla Helgasyni, framkvæmdastjóra flokksins.

Líklegt þykir að forystumenn stjórnarflokkanna hittist á ný síðar í dag. Á meðan eru forystumenn stjórnarandstöðunnar í viðbragðsstöðu og talið líklegt að miklar þreifingar séu í gangi um hvað taki við, fari svo að ríkisstjórnin falli í dag.