Verð geisladiska hefur lítið hækkað í 20 ár

Útsöluverð íslenskra geisladiska hefur lítið hækkað síðan árið 1991, en raunverð hefur lækkað, miðað við almenna verðþróun. Árið 1991 kostuðu þeir um tvö þúsund krónur stykkið en í ár í kringum 2.500.

Hefðu íslenskir diskar fylgt vísitölu neysluverðs myndu þeir kosta hátt í 4.600 krónur í ár.

„Árið 1991 voru nýjar bækur og nýir diskar á svipuðu verði. Nú geturðu fengið tvær plötur fyrir eina bók, og þú lest bókina bara einu sinni!" segir Lárus Jóhannesson í versluninni 12 tónum. Hljómdiskar ættu því að vera í sterkri stöðu.

Ásmundur Jónsson, formaður Félags hljómplötuframleiðenda, skýrir stöðugleika verðlags innlendra platna síðustu ár helst með samkeppni við ólöglegar niðurhalssíður: „Myndir þú kaupa mjólkina ef hún væri ókeypis?"

Hann tekur ekki undir að diskarnir hafi einfaldlega verið of dýrir árið 1991. Því fylgi mikill kostnaður að setja nýja plötu á markað.

Í ár virðist vera svolítill samdráttur í plötusölu fyrir jólin, miðað við sölu þrjátíu vinsælustu titlanna. Ásmund grunar að salan dreifist á fleiri titla en áður.

Baldvin Esra Einarsson, útgefandi hjá Borginni og Kima, segir söluna góða. Sumar plötur seljist mun betur en við var búist. Hann nefnir einnig að salan sé dreifðari, jaðarplötur seljist vel.

Hljómplötuframleiðendur og verslanir leggi nokkuð minna á vörurnar en áður.

„Við viljum halda plötuverði þannig að fólk ráði við að kaupa þær," segir hann.

Verð hafi hækkað um tíu til fimmtán prósent, sem sé ekki óeðlilegt miðað við verðlagshækkanir og dýrari erlendan kostnað.

Eftir gengishrun eru innfluttir diskar talsvert dýrari en innlendir og kosta á milli þrjú og fjögur þúsund krónur.

Ásmundur Jónsson segir að í kjölfar hruns hafi innflutningur snarminnkað og innlend tónlist hafi náð um 65 prósentum af sölunni:

„Mér sýnist að það hlutfall eigi ekki eftir að breytast erlendum diskum í vil."

Lárus Jóhannesson segir erlenda plötusölu í sinni búð svipaða og í fyrra.

Verslun hans sé þó eilítið sér á báti, enda fáist þar tónlist sem erfitt sé að finna annars staðar.

klemens@frettabladid.is