Ákvörðun tekin um Icesave fyrir áramót

Frumvarp um ríkisábyrgð vegna Icesave var tekið út úr fjárlaganefnd í gær.

Guðbjartur Hannesson, formaður nefndarinnar, segir stefnt að því að ljúka málinu á milli jóla og nýárs. Hann segir nýtt lögfræðiálit stofunnar Mishcon de Reya ekki breyta neinu um skoðun sína á málinu.

„Þetta er bara enn eitt álitið á Icesave-málinu. Þeir hafa farið vel yfir þennan samning og gagnrýnt hann. Það er ýmislegt fróðlegt í álitinu, en í raunveruleikanum breytir það ekki neinu.“ Guðbjartur segir málið á endanum pólitískt; þingmenn verði að fylgja sinni sannfæringu og samþykkja það eða hafna.

Björn Valur Gíslason, varaformaður fjárlaganefndar, gefur ekki mikið fyrir álitið. Hann segir fráleitt að Icesave-samningurinn sé óskýr, líkt og þar er haldið fram.

„Í fyrsta lagi er ljóst um hvað er verið að semja; lausn Icesave. Þá liggur upphæðin ljós fyrir í evrum og pundum. Það er hvellskýrt að lánið er til fimmtán ára og engin óvissa um að á því eru 5,55 prósenta vextir. Þá er alveg skýrt að við munum ekki borga af því fyrstu sjö árin og það liggur ljóst fyrir hvað muni gerast árið 2024 ef við getum ekki borgað.“

Björn Valur segir umhugsunarvert að umboðsmaður lögfræðistofunnar á Íslandi, Gunnlaugur Erlendsson, hafi unnið fyrir Novator „og þá hjá Björgólfsfeðgum sem áttu Landsbankann sem gerði út Icesave-reikningana.

Ég ætla ekki að halda því fram að þessi maður hafi náð fram lögfræðiáliti sem hentaði þeim betur, en vek athygli á þessu sérstaklega í því ljósi að aðrar lögfræðistofur hafa verið gerðar tortryggilegar fyrir vinnu fyrir ríkisstjórnina. Þessi hefur einnig unnið fyrir ríkisstjórnina.“

Björgvin og Guðbjartur nefna það báðir að lögfræðistofurnar tvær, Mishcon de Reya og Arhurst, séu sammála um að málið sé í fullkominni óvissu verði samkomulaginu hafnað.

Guðbjartur segir fjárlaganefnd hafa farið yfir þau sextán atriði sem þingið fól henni að gera.

„Við tókum þetta alvarlega og fórum yfir öll atriðin og sum ítarlegar en beðið var um.“ Hann segir eitt álit aðeins hafa borist munnlega, frá IFS, en það verði lagt fram skriflega á morgun.

kolbeinn@frettabladid.is