Fjögur hundruð kannabisplöntur haldlagðar

Lögreglan á höfuðborgarsvæðinu stöðvaði tvær kannabisræktanir í Hafnarfirði í gær. Alls voru 400 plöntur haldlagðar.

Við húsleit á öðrum staðnum fundust 230 kannabisplöntur, á ýmsum stigum ræktunar, eftir hádegi í gær. Tveir karlar á þrítugsaldri voru handteknir í tengslum við rannsókn málsins. Við húsleitir á heimilum þeirra fannst talsvert af marijúana. Þá var önnur ræktun stöðvuð í iðnaðarhúsnæði í Hafnarfirði um kvöldmatarleytið í gær. Við húsleit þar fundust 170 kannabisplöntur á ýmsum stigum ræktunar. Tveir karlar, annar á þrítugsaldri en hinn á fertugsaldri, voru handteknir í tengslum við rannsókn málsins.

Í tilkynningu frá lögreglunni kemur fram að fyrrnefndar aðgerðir séu liður í að hamla gegn sölu og dreifingu fíkniefna en sem fyrr minnir lögreglan á fíkniefnasímann 800-5005. Í hann má hringja nafnlaust til að koma á framfæri upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann.