Lokatölur úr Kraganum - Ögmundur verður þingmaður áfram

Ögmundur Jónasson heilbrigðisráðherra nær kjöri sem þingmaður í Suðvesturkjördæmi eftir að lokatölur hafa verið birtar. Samkvæmt tölunum fær VG tvo þingmenn í kjördæminu. Guðfríður Lilja Grétarsdóttir verður annar þeirra og Ögmundur hinn. Eftir að fyrstu tölur voru birtar í Suðvesturkjördæmi leit ekki út fyrir að Ögmundur næði kjöri.



Talin voru 48703 gild atkvæði og skiptust þau þannig.

Framsóknarflokkurinn 5627 - 1 maður kjörinn

Sjálfstæðisflokkurinn 13463 - 3 menn kjörnir

Frjálslyndi flokkurinn 741 - 0 menn kjörnir

Borgarahreyfingin 4428 - 1 maður kjörinn

Lýðræðishreyfingin 302 - 0 menn kjörnir

Samfylkingin 15669 - 5 menn kjörnir

VG 8473 - 2 menn kjörnir.

Á kjörskrá voru 58202. Greidd atkvæði voru 50315. Auðir seðlar voru 1519 og ógildir 93.

Nú er búið að telja atkvæði í öllum kjördæmum nema Norðausturkjördæmi en búist er við tölum þaðan mjög fljótlega.