U2 semur tónlist fyrir mynd Sigurjóns Sighvatssonar

Írska rokkhljómsveitin U2 semur nýtt lag fyrir kvikmyndina Brothers sem Sigurjón Sighvatsson framleiðir. „Þetta er bara eitt lag og kom í gegnum vinskap þeirra og leikstjórans, Jim Sheridan. Þeir hafa unnið áður saman og eru náttúrlega allir frá Írlandi," útskýrir Sigurjón í samtali við Fréttablaðið.

Hann vildi ekki meina að þessi vinsælasta hljómsveit heims hefði beðið um fúlgur fjár fyrir lagið. „Nei, þetta kostaði ekkert sérstaklega mikinn pening."

Kvikmyndaframleiðandinn upplýsir að Brothers hafi að mestu verið klippt í upptökuveri U2 á Írlandi og því hafi verið hæg heimatökin. Söngvarinn Bono leggur til textann og semur lagið í samstarfi við gítarleikarann The Edge.

Sigurjón kveðst ákaflega sáttur við að hafa fengið U2 um borð en bætir því við að það sé alltaf myndin sem geri útslagið. „Jú, jú, auðvitað getur verið gott að hafa nafn eins og U2 í markaðsherferðinni en það er alltaf myndin sjálf sem selur miðana."

Brothers skartar þeim Natalie Portman, Toby Maguire og Jake Gyllenhaal í aðalhlutverkum en leikstjóri er sem fyrr segir Jim Sheridan. Myndin er mikil örlagasaga þar sem stríðið gegn hryðjuverkum í Afganistan er í bakgrunni. Brothers er endurgerð á danskri kvikmynd eftir Susanne Bier sem hlaut mikið lof á sínum tíma.

Sigurjón kveðst ánægður með útkomuna. Stikla úr henni ætti að rata í sýningar á næstu dögum en myndin sjálf verður frumsýnd í byrjun desember. „Nokkrir gagnrýnendur hafa þegar séð myndina og verið hrifnir en viðbrögð áhorfenda skipta náttúrlega mestu máli," segir Sigurjón. Kvikmyndatímaritið Empire spáir því á vefsíðu sinni að Brothers sé í hópi 31 kvikmyndar sem hugsanlega geti keppt um Óskarsverðlaunin á næsta ári.