Innbrot í Rauða húsið

Brotist var inn í veitingastaðinn Rauða húsið á Eyrarbakka aðfaranótt laugardags. Þaðan var stolið sjóðvél og skjávarpa. Hluti þýfisins fannst í sandnámu vestan við Eyrarbakka.

Þetta kemur fram í tilkynningu frá lögreglunni á Selfossi. Þar segir einnig að grunur hafi fljótlega beinst að tveimur mönnum sem lögreglan á höfuðborgarsvæðinu handtók vegna innbrots þar. Annar mannanna braust inn í bát í Þorlákshöfn rétt fyrir síðustu jól en stökk í sjóinn þegar skipverji sem átti leið um höfnina sá til hans.

Þá segir í tilkynningunni að ráðist hafi verið á mann á skemmtistaðnum 800 bar á Selfossi aðfaranótt laugardagsins.

„Hann varð fyrir hnefahöggum og spörkum. Ekki er vitað um meiðsl en talið að þau hefðu verið minni háttar."