Mótmælandinn búinn að kæra hagfræðinginn

Hermann Valsson mótmælandi hefur kært Ólaf Klemensson hagfræðing hjá Seðlabankanum fyrir árás. Hermann segir Ólaf hafa bakkað á sig í morgun fyrir utan bankann en Ólafur hefur kært Hermann fyrir að skemma bíl sinn. Vitni að atvikinu segir Ólaf hafa bakkað á Hermann.

„Ég er búinn að kæra hann fyrir árás. Þetta er sami maður og sýndi ógnandi hegðun á kryddsíldarmótmælunum þannig að hann virðist hafa þetta allt á hornum sér," segir Hermann í samtali við Vísi.

Ólafur sagði í morgun í samtali við Vísi að Hermann hefði skemmt bíl sinn með því að lemja í hann en nokkuð sér á bílnum að sögn Ólafs.

Björgvin Ingi Jónsson varð vitni að uppákomunni og segir klárt mál að Ólafur hafi bakkað á Hermann.

„Ólafur keyrir inn á bílastæðið og inn í stæði. Svo er hann að fara að snúa við og bakkar, ég veit ekki hvort hann hafi litið aftur fyrir sig. Hann bakkar allavega mjög harkalega og bara beint á hann, þá lemur Hermann eitthvað í bílinn þegar Ólafur ætlar að reyna að bakka lengra. Síðan keyrir hann útaf stæðinu. Hann hefði alveg mátt vita af honum á bak við bílinn með því að líta í spegilinn," segir Björgvin.

Því næst keyrir Ólafur að Ingólfsstræti og ræðir við lögregluna. Hermann segist hafa komið þangað og kært Ólaf fyrir að keyra á sig.