Margt þarf að skoða í tengslum við bankahrunið

Ólafur Þór Hauksson, sérstakur saksóknari, boðaði til blaðamannafundar í dag og kynnti starfsemi embættisins. Auk Ólafs hafa fjórir verið ráðnir: þeir Grímur Grímsson , Hólmsteinn Gauti Sigurðsson, og Sveinn Ingiberg Magnússon og Sigurður Tómas Magnússon. Þeir hófu störf í síðustu viku og gera ráð fyrir að funda nánar með samstarfsaðilum sínum, s.s. ríkisskattstjóra og fjármálaeftirlitinu í þessari viku.

,,Að fyrstu fundum að ætla eru mörg atriði sem við teljum að þurfi að skoða," segir Ólafur Þór.

Sérstakt ákvæði um uppljóstrara er í lögum um sérstakan ríkissaksóknara. Samkvæmt því getur sá sem lætur lögreglu eða saksóknara í té upplýsingar sloppið við ákæru, þrátt fyrir að upplýsingarnar leiði líkur að broti hans sjálfs. Búið er að opna vefsvæðið serstakursaksoknari.is þar sem hægt er að senda inn ábendingar.