Evrópubúar sólgnir í þorsklifur í dós

Það fer ekki mikið fyrir þessari starfsemi í lágreistri byggingu við höfnina í Grindavík. Fyrir innan er afkastamikil verksmiðja að framleiða sælkerafæði fyrir kaupendur í Evrópu. Það er verið að sjóða íslenska þorsklifur niður í dósir, allt upp í 40 þúsund dósir á dag.

Lifrin kemur glæný frá útgerðum í Grindavík og víðar á Suðurnesjum. Mannskapurinn hefur margfaldast frá því í fyrravor þegar þau voru þrú í fjölskyldunni að sjóða niður í dósir. Nú eru starfsmennirnir tuttugu talsins og stefnt að því að fjölga, að sögn Birkis Kristjánssonar framleiðslustjóra Ice-West. Og fólkið vinnur 70 til 90 yfirvinnutíma í mánuði.

Hluta af vélbúnaði máttum við ekki mynda, nýtt tæki sem hreinsar orma úr lifrinni með ensímum, en það er hannað í samvinnu við Martak í Grindavík.

Birkir segir það hafa verið barning að byggja fyrirtækið upp. Engin lán hafi fengist úr bönkum sem á sama tíma stóðu galopnir þeim sem vildu kaupa lúxusjeppa. Þó er ekkert lát á sölunni. Stórar pantanir berast og hann hefur engar áhyggjur af markaðsmálum. Helstu áhyggjurnar eru af peningamálum. Fyrirtækið fær ekki eðlilega lánafyrirgreiðslu. Synjað er um hærri afurðalán þrátt fyrir góðar tryggingar.