Eigum ekki annarra kosta völ

„Niðurskurður í heilbrigðiskerfinu er lögþvingaður. Honum verður ekki breytt nema fjárlög verði tekin upp á ný. Þetta er ekki ljúft verk en við eigum ekki annarra kosta völ en að draga saman seglin,“ segir Ögmundur Jónasson heilbrigðis­ráðherra.

Fyrirhugaður er 6,7 milljarða króna niðurskurður í heilbrigðisgeiranum á árinu. Ögmundur segir nauðsynlegt að finna leiðir til sparnaðar, svo sem með lækkun lyfjakostnaðar ásamt skipulagsbreytingum í stjórnsýslunni og tilhögun vinnu í heilbrigðisgeiranum.

Reynt verði eftir megni að láta niðurskurðinn ekki bitna á starfsfólki auk þess sem reynt verði að hlífa því starfsfólki sem hafi lágar tekjur á kostnað hinna.

„Ég hef sett fram þau pólitísku markmið sem eiga að tryggja heilbrigðisþjónustuna og aðgengi að henni. Þegar kemur að launakostnaði verður það gert með kjarajöfnun að leiðarljósi,“ segir Ögmundur og vonast eftir samstöðu um markmiðin.

Reynt verði að fá sem flesta að samningaborðinu til að ná markmiðunum fram. Þá verði horft til aðstæðna hverju sinni. „Það er sárt til þess að hugsa að heilbrigðisgeirinn hafi ætíð setið á hakanum og nú þurfi að skera þar niður,“ segir heilbrigðisráðherra. - jab