Lögreglan leitar að dýru þýfi

Lögreglan á Selfossi leitar dýrra muna eftir að brotist var inn í tilraunahús Landbúnaðarháskóla Íslands á Reykjum í Ölfusi.

Innbrotið átti sér stað um þar síðustu helgi. Úr tilraunahúsinu var stolið ýmsum sértækum hlutum. Fyrst er þar að nefna gróðurhúsalampa sem er sá eini sinnar tegundar hér á landi. Hann var þáttur í tilraunaverkefni. Lampinn er knúinn rafgasi og hefur þá eiginleika að hann hitnar nánast ekkert. Því er hægt er að hafa hann mjög nærri plöntunum sem gefur betri nýtingu á birtuna. Einnig var stolið tuttugu gróðurhúsaperum, jarðvegshitamæli, rafspennumæli, lengdarmælitæki og tæki til að mæla jarðvegsraka. Tækið er gagnslaust þeim sem hefur það undir höndum þar sem því á að fylgja tölvukubbur sem er nú á öðrum stað. Lögreglan biður alla þá sem veitt geta upplýsingar um þetta innbrot eða ofangreinda hluti að hafa samband við lögregluna á Selfossi í síma 480 1010.

Þessu til viðbótar leitar lögregla til almennings vegna innbrots á dekkjaverkstæði við Unubakka í Þorlákshöfn. Þaðan var stolið sextán jeppa- og fólksbíladekkjum. Verðmæti þeirra er á fjórða hundrað þúsund krónur. - jss