Átta nauðganir verið kærðar í mánuðinum

Átta nauðganir hafa verið kærðar til lögreglu það sem af er maímánuði, samkvæmt heimildum Fréttablaðsins, og hafa þær aldrei verið fleiri í einum mánuði. Öll málin áttu sér stað á höfuðborgarsvæðinu. Undanfarin ár hafa um 30 til 40 nauðganir verið kærðar á ári til lögreglu á því svæði.

Björgvin Björgvinsson, yfirmaður kynferðisbrotadeildar lögreglu, gat ekki staðfest að um átta mál væri að ræða, en sagði það þó nærri lagi. Hann segir um óvenjumargar kærur að ræða í maí. „Þetta kemur nú oft í köstum, en ég hef ekki séð svona margar á svo stuttum tíma áður." Málin tengjast ekki en aðeins einn maður er í haldi vegna rannsóknar á nauðgunarmáli.

Björgvin segir málin ólík og ýmist sé um tengsl á milli geranda og fórnarlambs að ræða eða ekki. Nauðganir séu hins vegar mjög tengdar skemmtistöðum og áfengisneyslu.

Eyrún Jónsdóttir, umsjónarhjúkrunarfræðingur á Neyðarmóttöku vegna nauðgana hjá Landspítalanum, segir mörg mál hafa komið upp á skömmum tíma hjá þeim. Reynslan sýni að tæplega helmingur mála sé kærður til lögreglu, en í fyrra voru málin 118.

Eyrún segir umræðu í samfélaginu ýta undir kærur og þá hafi verklag lögreglunnar breyst til batnaðar. Helgi Gunnlaugsson afbrotafræðingur segir tilkynningum um kynferðisbrot hafa fjölgað á undanförnum árum. Erfitt sé að segja til um hvort það sé raunaukning, eða hvort þolendur séu reiðubúnari en áður að koma fram og kæra.

Helgi segir flest nauðgunarmál koma upp í kringum skemmtanahald. „Það er ákveðin örvænting í samfélaginu og hún vill oft brjótast fram við aðstæður sem ríkja í skemmtanahaldi við ölvun. Það eru áhættuþættir sem liggja í samfélagsgerðinni núna, óvissuþættir, sem geta blásið út. Heift sem menn bera í hljóði og getur komið upp."

- kóp