Boðið upp á gullkryddað risotto í forrétt

Þegar veislan stóð sem hæst í útrásinni árið 2007 kepptust bankarnir við að gera vel við stærstu viðskiptavini sína. Í einni boðsferð Landsbankans var um 300 manna hópi meðal annars boðið upp á Risotto sem kryddað var með gulli.

Í Mannlífi sem kemur út á morgun er grein þar sem greint er frá því hvernig bankarnir reyndu að toppa hver annan í að gera vel við helstu viðskiptavini sína og var þá oft engu til sparað. Septembermánuður 2007 var annasamur mánuður í þessum efnum hjá Landsbankanum, samkvæmt því sem segir í grein Mannlífs. í þeim mánuði opnaði bankinn útibú í Hong Kong sem átti að verða upphafið að útrás bankans í Asíu.

Öllum helstu stjórnendum bankans, bankastjórunum Sigurjóni Árnasyni og Halldóri Kristjánssyni, bankaráðsmanninum Kjartani Gunnarssyni ásamt helstu viðskiptavinum innanlands og utan var flogið í veisluna. Gestirnir gistu að sjálfsögðu allir á fimm stjörnu hótelum og segir Mannlíf að gistikostnaðurinn einn og sér hafi verið um 24 milljónir króna. Flogið var með hundrað kílóa ísklump úr Vatnajökli og í aðalveislunni var boðið upp á heilsteiktan grís, eins og hjátrú Kínverja segir að boði gott gengi.

Asíuævintýrið rann hins vegar fljótlega út í sandinn. Í sama mánuði voru leigðar tvær stórar farþegaþotur undir um 300 viðskiptavini bankans og aðrir gestir komu í um 20 einkaþotum, í samkvæmi Landsbankans í Mílanó á Ítalíu vegna opnunar útbús þar. Meðal gesta í ólíkum veislum bankans voru helstu auðmenn landsins eins og Hannes Smárason, Jón Ásgeir Jóhannesson, Pálmi Haraldsson, Magnús Ármann og Björgólfur Thor Björgólfsson, segir í Mannlífi.

Fréttastofan hefur rætt við nokkra gesti í þessari ferð sem allir lýstu miklum íburði en enginn vildi koma fram undir nafni. Heimildarmaður Mannlífs segir hins vegar um veislu í 15. aldar hallargarði, að þar hafi verið boðið upp á risotto með gullflögum. "Ég hugsaði með mér að það væri ekki hægt að ganga lengra en éta gullið."

Og síðar segir viðmælandi Mannlífs: "Ég hélt að það væru aðeins guðirnir sem borðuðu gull." Hann mælir reyndar ekki með því, gullið hafi verið dauft á bragðið:

"Það er bara málmbragð af því,"bætir gesturinn við og segir að í veislunni hafi um fjögur til fimm hundruð Íslendingar gætt sér á risotto með gulli.

Þessi ferð kostaði tugi milljóna enda verðið á gistingunni um 50 þúsund krónur fyrir nóttina á hvern mann. Landsbankinn var langt í frá einn um veisluhöld sem þessi því gömlu bankarnir héldu allir slíkar veislur, svo ekki sé minnst á veislur margra útrásarvíkinga á öðrum vettvangi.