Heilsuspítali mun skila milljörðum í gjaldeyristekjur

Stefnt er að því að hefja byggingu á einkaspítala og heilsuhóteli á næsta ári. Forsvarsmenn spítalans telja að starfsemin muni geta skilað allt að 10 þúsund ferðamönnum til landsins og rúmlega 10 milljörðum í gjaldeyristekjur. Fyrirhugaður spítali verði byggður upp á grænum gildum, að sögn framkvæmdastjóra Primacare sem stendur á bak við verkefnið.

Rætt var við Gunnar Ármannsson, framkvæmdastjóra Primacare sem stendur á bak við fyrirhugaðan spítala, í Kastljósi í kvöld. Þar kom fram að spítalinn verður sá eini i heiminum sem mun sérhæfa sig í mjaðmaskipta- og hnjáliðaaðgerðum en sjúklingarnir munu eingöngu koma frá útlöndum.

Gunnar sagði mikla eftirspurn verða eftir slíkum aðgerðum á næstum árum vegna svokallaðra lífsstílsjúkdóma á borð við offitu og sykursýki. „Við ætlum að horfa á þennan gríðarlega stóra markað."

Áætlanir gera ráð fyrir að fyrirhugaður spítali verði svipaður að stærð og Barnaspítali Hringsins, með um 65 til 70 rúm. Gunnar sagði að framkvæmdar verði á bilinu 3000 til 3500 aðgerðir á ári hverju.

„Með þessum sjúklingum koma yfirleitt alltaf einhverjir úr fjölskyldunni. Kannski einn eða tveir með hverjum. Þannig að við erum kannski að horfa fram á það að landsins komi 10 þúsund ferðamenn á hverju ári til að koma í þessar aðgerðir," sagði Gunnar.

Forsvarsmenn spítalans hafa ekki rætt við Ögmund Jónasson, heilbrigðisráðherra, vegna málsins.