Dópparið í Madríd: Var með 10 til 20 kíló af kókaíni

Parið sem situr í gæsluvarðhaldi á Spáni eftir að þau voru handtekinn með kókaín á flugvellinum í Madríd hefur komið við sögu fíkniefnalögreglunnar hér á landi. Hún fylgist með málinu en rannsóknin er alfarið á forræði kollega þeirra á Spáni. Parið var með eitthvað á bilinu 10 til 20 kíló af kókaíni í fórum sínum þegar það var handtekið á Baraja flugvelli fyrir jól. Efnin voru falin í ferðatöskum. Fréttastofa hefur þetta eftir heimildum innan lögreglunnar.

Parið, sem er rúmlega tvítugt, var handtekið þann 17.desember en þau voru að koma frá Perú. Það voru tollgæslumenn á flugvellinum sem stöðvuðu parið en þau voru svo handtekin og úrskurðuð í gæsluvarðhald sem þau hafa setið í síðan.

Lögreglan í Madríd fer með rannsókn málsins en þar er lítið gefið upp um málið. Samkvæmt upplýsingum fréttastofu hefur parið verið viðloðandi fíkniefni í nokkur ár hér á Íslandi og fengið nokkra væga dóma vegna þess en aldrei vegna innflutnings eða einhvers af þeirri stærðargráðu.

Dómar vegna fíkniefnamála er afar þungir á spáni, að sögn ræðismanns íslands í madríd en hann hefur fylgst með málinu undanfarna daga og heimsótti íslendinganna í fangelsið þar sem þau eru vistuð en það er um 30 kílómetrum fyrir utan höfuðborgina.

Þá greindu spænskir fjölmiðlar nýlega frá því að talið sé að hluti af liðlega 30 kílóum af kókaíni, sem lögreglan í Portúgal fann í fórum tveggja manna í byrjun desember, hafi átt að fara í dreifingu á Íslandi. Ekki er greint frá þjóðerni mannanna sem voru handteknir vegna málsins en þeir munu ekki vera íslenskir.