Tónskáld mótmæla

Enn halda áfram opinber mótmæli vegna afstöðu fulltrúa Bandalags íslenskra listamanna í Menningarmálanefnd Reykjavíkur sem fettu fingur út í þá ákvörðun nefndarinnar að velja Steinunni Sigurðardóttur sem Borgarlistamann 2009. Nú hefur borist yfirlýsing frá stjórn Tónskáldafélags Íslands varðandi útnefninguna.

„Að gefnu tilefni vill stjórn Tónskáldafélags Íslands koma eftirfarandi á framfæri varðandi útnefningu Steinunnar Sigurðardóttur fatahönnuðar sem borgarlistamanns Reykjavíkurborgar árið 2009.

Stjórn BÍL hefur aldrei fjallað um útnefningu borgarlistamanns 2009. Sú yfirlýsing sem áheyrnar­fulltrúar BÍL í Menningar- og ferðamálaráði Reykjavíkurborgar – þau Ágúst Guðmundsson, forseti BÍL, og Áslaug Thorlacius, formaður SÍM, hafa sett fram varðandi útnefningu Steinunnar Sigurðardóttur fatahönnuðar í nafni BÍL – nýtur því ekki stuðnings Tónskáldafélags Íslands.

Þá harmar stjórn Tónskáldafélagsins að íslenskir listamenn séu dregnir inn í slíkar umræður með þessum hætti.

Að lokum óskar stjórn Tónskáldafélags Íslands Steinunni Sigurðardóttur fatahönnuði til hamingju með útnefninguna sem borgarlistamaður Reykjavíkurborgar árið 2009. F.h. stjórnar, Kjartan Ólafsson, formaður.“