Margt bendir til blekkinga

Það er margt sem bendir til þess að hér á landi hafi átt sér stað sýndarviðskipti og blekkingarleikur til að halda uppi verði á bréfum fyrirtækja, segir viðskiptaráðherra. Með því hafi markaðsaðilar og stjórnvöld verið blekkt.

Björgvin G. Sigurðsson, viðskiptaráðherra, vill ekki, að svo stöddu, leggja neinn dóm á hvort að kaup Al-Thani á 5% hlut í Kaupþingi hafi verið sýndarkaupmennska til að fegra stöðu bankans. Hinsvegar megi sjá vísbendingar um að slíkt hafi verið gert í öðrum tilvikum.

Aðspurður hvort fjármálaeftirlitið hafi ekki staðið sig segir Björgvin það ekki aðalatriðið. Auðveldlega sé hægt að fara í kringum lög og reglur ætli menn sér það. Viðskiptalíf á Íslandi búi við mjög ófullkominn lagaramma.

Björgvin segir að unnið sé að því dag og nótt að vinna úr upplýsingum úr skýrslum endurskoðunarfyrirtækja um starfsemi bankanna fyrir hrunið.