Skoða málshöfðun gegn stjórnendum Landsbankans

Steingrímur J. Sigfússon fjármálaráðherra segir að verið sé að skoða hvort hægt sé að höfða mál gegn fyrrverandi stjórnendum Landsbankans vegna Icesave málsins.

„Þessir þættir eru allir í skoðun. Við höfum farið yfir það í ráðuneytinu hjá mér hvernig eigi að gæta hagsmuna ríkisins og almennings almennt í tengslum við þessi mál og það snýr að mörgum þáttum. Svo sem hagsmunagæslu, meðferð krafna og kröfulýsingum, hvernig gætt verður að eignahlutum sem ríkið þarf að tryggja. Og það snýr líka að mögulegri skaðabótaábyrgð og slíkum hlutum," segir fjármálaráðherra. Hann segir að þessi atriði séu í skoðun í samráði við Ríkislögmann og fleiri aðila.

Steingrímur segir að unnið sé eins hratt að málunum og auðið er og að þeim sé unnið á mörgum sviðum. Skattayfirvöld hafi haft mikið að gera og fyrir þinginu liggi frumvarp um að Skattrannsóknarstjóri fái heimild til að kyrrsetja eignir. Þá sé búið að stórefla embætti sérstaks saksóknara.