Fjórtán þúsund nemendur í grunnskólum í Reykjavík

Rúmlega 14 þúsund nemendur taka til starfa í grunnskólum í Reykjavík þegar skólar verða settir á mánudaginn. Þar af eru um 13.600 í skólum í rekstri Reykjavíkurborgar og um 400 í sjálfstætt starfandi grunnskólum. Rúmlega 1.300 börn eru að stíga sín fyrstu skref í grunnskólagöngunni. Fjölmennasti grunnskóli Reykjavíkurborgar er Árbæjarskóli með 725 nemendur, en fámennastur er Ártúnsskóli með 152 nemendur.

Í fréttatilkynningu frá Menntasviði kemur fram að nemendur í skólum borgarinnar eru um 300 færri en haustið 2008. Heildarfjöldi starfsmanna í grunnskólum Reykjavíkurborgar er um 2.500 í um 2.100 stöðugildum eða svipaður og síðustu árin. Í tilkynningunni kemur jafnframt fram að vel hafi gengið að manna stöður í skólunum en um þessar mundir sé auglýst eftir fólki í nokkrar stöður skólaliða.