Hátt í þúsund manns mótmæltu á Austurvelli

Hátt í eitt þúsund manns mótmæltu á átjánda mótmælafundi Radda fólksins sem var haldinn á Austurvelli klukkan þrjú í dag. Á heimasíðu samtakanna segir að enn eigi eftir að fella lokavígi landráða og valdagræðgi í íslenskri flokkspólitík þar sem stjórn Seðlabankans sitji enn. Þeir vanhæfu einstaklingar sem þar sitji verði að víkja tafarlaust og sæta ábyrgð fyrir embættisafglöp. Það var sem fyrr Hörður Torfason sem fór fyrir mótmælendunum. Hann boðar til mótmæla fyrir framan Seðlabankann á mánudagsmorgun klukkan átta. Hann leggur til að fólk mæti með potta og pönnur og láti í sér heyra í friðsömum mótmælum.