Morgunblaðsljósmyndari í vinnu fyrir lögregluna

„Mér finnst harla óeðlilegt að blaðamenn, ljósmyndarar eða tökumenn séu að vinna fyrir lögregluna," segir Óðinn Jónsson, fréttastjóri útvarps, um það að ljósmyndari Morgunblaðsins skuli einnig starfa sem ljósmyndari fyrir lögregluna.

Ljósmyndarinn Júlíus Sigurjónsson hefur til margra ára starfað bæði sem ljósmyndari Morgunblaðsins og lögreglunnar í Reykjavík. Hann hefur einnig verið ljósmyndari slökkviliðsins og Rannsóknarnefndar umferðarslysa.

Aðrir miðlar hafa kvartað yfir því við lögreglu og slökkvilið að Júlíus hafi í krafti stöðu sinnar sem ljósmyndari embættanna haft annan og greiðari aðgang að starfsvettvangi þeirra en ljósmyndarar og tökumenn annarra miðla.

„Við höfum ítrekað gert athugasemdir við þetta fyrirkomulag. Auðvitað er það óþolandi þegar lögreglan ræsir út blaðamann Morgunblaðsins á vettvang á sama tíma og hún veitir öðrum fjölmiðlum ekki upplýsingar þegar eftir þeim er leitað. Það er til nóg af sjálfstætt starfandi ljósmyndurum, utan fjölmiðla, sem eru tilbúnir að taka að sér þessi verkefni fyrir lögregluna," segir Jón Kaldal ritstjóri Fréttablaðsins.

Mál af þessum toga kom síðast upp í fyrrakvöld þegar lögregla rannsakaði mannslát í dúfnakofa í Hafnarfirði. Varðstjóri lögreglu lét fjölmiðla ekki vita af málinu við venjubundna eftirgrennslan þeirra, en Júlíus var á vettvangi og myndaði fyrir lögregluna og Morgunblaðið.

„Þetta skekkir samkeppnisstöðu fjölmiðlanna og gengur auk þess ekki upp, hvorki faglega né siðlega," segir Óðinn Jónsson. „Ég myndi aldrei leyfa mínu fólki að vinna við þetta fyrirkomulag."

„Mér finnst það fullkomlega óeðlilegt og hreint með ólíkindum að ljósmyndari á fjölmiðli sé að vinna fyrir lögregluna," segir Óskar Hrafn Þorvaldsson, fréttastjóri Stöðvar 2 og Vísis.

„Þær eru fleiri en tíu stórfréttirnar á undanförnum mánuðum sem þeir hafa náð í gegnum þessi einkennilegu sambönd. Það er bara óþolandi með öllu og ólíðandi. Við höfum átt fundi með Stefáni Eiríkssyni um málið og þeir fundir hafa engu skilað," segir Óskar.

Arna Schram, formaður Blaðamannafélags Íslands, segist ekki hafa skoðun á því hvar fólk starfar samhliða blaðamennsku. Það sé hvers og eins að meta hvort trúverðugleiki er í húfi. „En lögreglan á auðvitað að tryggja að allir fjölmiðlar sitji við sama borð. Annað er óþolandi."

Stefán Eiríksson lögreglustjóri staðfestir að Júlíus hafi „um árabil" starfað fyrir lögregluna og þegið greiðslur fyrir. „Ef það er afstaða blaðamanna og blaðaljósmyndara að óeðlilegt sé að ljósmyndarar sem starfa á fjölmiðlum selji myndir sem þeir taka til stofnana þá munum við sjálfsagt taka það til skoðunar," segir hann.

Ólafur Þ. Stephensen, ritstjóri Morgunblaðsins, sagðist í viðtali á Bylgjunni í gær aldrei hafa heyrt að Júlíus þæði laun hjá lögreglunni.

stigur@frettabladid.is