Geir: Stjórnarmyndun langt komin áður en Ingibjörg kom heim

Fullt er út úr dyrum á fundi sjálfstæðismanna á Grand hotel sem hófst klukkan eitt. Á fundinum fer Geir H. Haarde, formaður flokksins og fráfarandi forsætisráðherra yfir stöðuna og það „uppbyggingarstarf sem framundan er í íslensku þjóðfélagi," eins og sagði í tilkynningu frá flokknum. Í máli Geirs kom meðal annars fram að hann telji myndun nýrrar ríkisstjórnar hafa verið langt komna áður en Ingibjörg Sólrún Gísladóttir sneri heim frá Svíþjóð.

Að mati Geirs var stjórninni í raun slitið á félagsfundi Samfylkingarinnar sem haldinn var í Þjóðleikhúskjallaranum á miðvikudag í síðustu viku. Hann segist ekki viss um að það hafi verið vilji Ingibjargar Sólrúnar.

Í ræðu sinni sagðist Geir einnig þeirrar skoðunar að stjórnmálaátök síðustu daga snúist ekki um persónur. Jóhanna Sigurðardóttir sé mæt kona sem hann hafi átt gott samstarf við. Hann óskaði nýrri ríkisstjórn velfarnaðar.

Að sögn Geirs eru líkur á því að Sjálfstæðisflokkurinn muni standa fyrir prófkjörum í flestum kjördæmum á næstu vikum. Hann vill að væntanlegir frambjóðendur komi sér saman um þak á kostnaði í prófkjörunum og að hans mati ætti sá kostnaður ekki að vera nema helmingur þess sem ný kosningalög segja til um. Andra Óttarssyni, framkvæmdastjóra flokksins hefur verið falið að samræma þessar reglur.

Í máli Geirs kom meðal annars fram mikil gagnrýni á stöðu Fjármálaeftirlitsins nú um stundir sem hann sagði hafa verið skilið eftir stjórnlaust. Forstjóri, stjórn og viðskiptaráðherra hafi sagt af sér og enginn sé til þess að skipa nýja stjórn.

Hátt í sjöhundruð manns eru á fundinum.

Fundurinn hófst klukkan 13 og ráðgert er að hann standi til klukkan 17.