Ölvaður öldungur ók gegnum bílskúrshurð

Ölvaður ökumaður á níræðisaldri slapp ómeiddur eftir að hafa ekið á bíl og hús nágranna síns á Selfossi í gærkvöldi og hafnað síðan inni á gafli í eigin bílskúr. Bílskúrinn var reyndar lokaður, en hann splundraði hurðinni og komst þannig inn. Bíll mannsins er talinn ónýtur eftir þetta og bíll nágrannans er töluvert skemmdur en ekki sér á húsinu. Upphaflega ætlaði maðurinn að setja bíl sinn inn í bílskúr, en setti óvart í afturábakgír og þeyttist yfir götuna á bíl og hús nágrannans. Þá setti hann í áframgír, yfir götuna aftur og í gegnum bílskúrshurðina.