Mesta aflahrota síðari ára

Ótrúleg aflahrota, einhver sú mesta sem komið hefur í áratugi, er nú við vestan- og norðanvert landið, og fiskarnir eru stærri og vænni en menn hafa lengi séð.

Sjómennirnir á Tryggva Eðvarðs biðu löndunar á Rifi með tíu tonna afla um borð, mest steinbít, veiddan á línu. Báturinn var enn hlaðnari um daginn þegar þeir komu með yfir sautján tonn.

Samskonar fréttir berast frá Vestfjörðum og Norðurlandi að sögn Arthúrs Bogasonar hjá Landsambandi smábátasjómanna og vitnaði í mann sem verið hefur fimmtíu ár á sjó og aldrei séð annað eins. Aflaverðmætið frá áramótum, bara í Snæfellsbæ, er fjórir milljarðar króna.

Annað sem sjómennirnir nefna er óvenju stór og vænn þorskur og segja þeir greinilegt að hann hafi mikið æti, raunar svo mikið að hann er tregari að bíta á ryðgaða öngla. Skipstjóri, sem stundað hefur sjóinn í 34 ár, sagði á Stöð 2 að hann hefði aldrei séð aðra eins veiði á ferlinum.