Stórbruni í fiskeldisstöð í Fljótum - mikið tjón

Allt tiltækt slökkvilið Skagafjarðar var kallað að Lambanesreykjum í Fljótum nú um hádegisbil, en þar logar eldur í fiskeldisstöð.

Þetta kemur fram á skagfirska fréttavefnum feykir.is.Slökkviliðið er enn að berjast við eldinn en mikil hætta var í upphafi þar sem óttast var að eldurinn næði í súrefniskúta sem eru í húsinu. Slökkviliðinu tókst þó að koma í veg fyrir að svo færi.

Eitthvað er af eiturefnum í öðrum enda hússins þar sem enn logar eldur í þaki og veggjum en slökkvilið telur sig hafa tök á ástandinu en mikið verk óunnið enn. Búist er við að slökkvistarfi ljúki ekki fyrr en seinni partinn eða í kvöld.

Í samtali við Feyki segir eigandi stöðvarinnar að um gríðarlegt tjón sé að ræða, ekki síst tilfinningalegt, þar sem fyrirtækið sé að stíga sín fyrstu skref undir hans stjórn.

Nýr starfsmaður mætti til vinnu í morgun og hófst vinnudagur hans á því að skoða aðstæður í húsinu. Pósturinn uppgötvaði síðan eldinn 5 mínútur yfir tólf og voru slökkviliðin á Sauðárkróki og Siglufirði þegar kölluð á vettvang.

Veggur hefur verið rofinn til að komast að eiturefnunum og freista þess að slökkva eldinn þar.