Slökkviliðsstjórinn í Skagafirði: Búnir að ná tökum á eldinum

Vernharð Guðnason slökkviliðsstjóri hjá Brunavörnum Skagafjarðar segir að menn séu farnir að sjá fyrir endann á slökkvistarfi við fiskeldisstöðina á Lambanesreykjum í Fljótum. Eldur kom þar upp í hádeginu í dag en slökkvilið var komið á vettvang rétt fyrir klukkan 13:00. Töluverð hætta var á ferðum þar sem mikið er af eiturefnum í húsinu sem er yfir tvö þúsund fermetrar.

„Við erum búnir að slökkva allan megin eld og erum nú að vinna í því að rífa niður veggi og komast að fleiri glæðum í þaki og veggjum," segir Vernharð en töluvert var af svokölluðum Lúti innan dyra, sem er basi og nokkuð hættulegur.

„Menn eru auðvitað alltaf í hættu við slökkvistörf. Hluti af þakinu er nokkuð sigin og því er nokkur hrunhætta á staðnum. Við getum því ekki sent menn eins mikið inn og við vildum, þannig að þetta tekur smá tíma," segir Vernharð aðspurður um hvort hætta hafi skapast á staðnum.

Vernharð segir ekkert vitað um eldsupptök að svo stöddu en byggingin sé stór og mikil. Að Lambanesreykjum var starfrækt bleikjueldisstöð en ekki er langt síðan að stöðin var endurreist.