Hverjum er það að kenna ef Newcastle fellur?

Ef Newcastle fellur úr ensku úrvalsdeildinni um næstu helgi, verður það hvorki Manchester United né Hull að kenna, heldur félaginu sjálfu.

Þetta er niðurstaða pistils sem Martin Samuel ritar á vef Daily Mail í dag.

Newcastle sækir Aston Villa heim í lokaleik sínum í deildinni á meðan helstu keppinautar liðsins, Hull City, mætir varaliði Manchester United sem hvílir sína bestu menn fyrir úrslitaleikinn í meistaradeildinni og er þegar búið að tryggja sér Englandsmeistaratitilinn.

Einhver myndi segja að það væri ósanngjarnt að lið í botnbaráttu fengi að spila við varalið annars liðs í lokaumferðinni, en eins og Samuel bendir réttilega á í pistli sínum er langt síðan vitað var að Hull myndi spila við United lið í lokaumferðinni sem ef til vill hefði um annað að hugsa á þeim tímapunkti.

Nei, ef Newcastle fellur, verður það alfarið félaginu sjálfu að kenna - ekki síst eiganda og stjórn. Lítum á bláköld rök frá Martin Samuel.

Ef Newcastle fellur verður það af því að...

-Liðið hefur aðeins unnið tvo útileiki í vetur

-Það hefur tapað sjö sinnum á heimavelli

-Það hefur aðeins fengið 22 stig á heimavelli

-Það hefur fengið á sig 29 mörk á heimavelli

-Það hefur tapað stigum á móti lakari liðum í deildinni

-Það er með níu framherja sem skora ekki mörk

-Alan Shearer er fjórði stjóri liðsins á leiktíðinni

-Varnarleikurinn er ömurlegur

-Newcastle á einn vinstri bakvörð og hann er meiddur

-Félagið seldi sinn besta leikmann (Shay Given)

-Eigandi félagsins er vonlaus

-Fyrrum eigandi félagsins var það líka

-Félagið hefur keypt gagnslausa leikmenn dýru verði

-Eigandinn kom á gölluðu stjórnkerfi innan félagsins

-Sjúkraþjálfarar félagsins eru vanhæfir

-Félagið hefur verið í molum lengi og það er loksins að bitna á því núna