Vonast til að lánasamningar verði fljótlega í höfn

Steingrímur J. Sigfússon fjármálaráðherra segir að viðræður við fjármálaráðherra Svíþjóðar um gjaldeyrislánasamninga gangi vel.

Steingrímur hélt út til Svíþjóðar í dag ásamt Svein Harald Øygard seðlabankastjóra og Jóni Sigurðssyni, formanni viðræðunefndar íslenska ríkisins um gjaldeyrissamningana. Steingrímur segir að verið sé að vinna að því að ganga frá samningunum og lánakjörum. Hann segist þó ekki geta sagt til um það hvenær þeirri vinnu lýkur en vonast til að það gerist bráðlega.

Um er að ræða lánafyrirheit sem Norðurlöndin gáfu Íslendingum með samkomulagið við Alþjóðagjaldeyrissjóðinn til hliðsjónar. Lilja Mósesdóttir, nýr þingmaður VG, hefur hins vegar lýst yfir vilja til þess samningum við Alþjóðagjaldeyrissjóðinn verði sagt upp og samið um frekari lán, á betri kjörum, við Norðurlöndin. Undir þessa skoðun tók Þór Saari þingmaður Borgarahreyfingarinnar við umræður um stefnuræðu forsætisráðherra, sem fram fór í vikunni. Steingrímur segir þó ekkert slíkt hafa verið til umfjöllunar í dag. „Nei nei, við ræddum ekkert slíkt," segir Steingrímur.

Steingrímur mun ekki staldra lengi við í Svíþjóð, því hann mun koma aftur til Íslands í dag. „Enda fer ég ekki út nema ef brýna nauðsyn ber til, eins og í þessu tilviki," segir Steingrímur í samtali við fréttastofu.