Tjón vegna Suðurlandsskjálfta á fimmta milljarð

Viðlagatrygging Íslands hefur greitt 4,7 milljarð króna vegna Suðurlandsskjálfta í maí í fyrra. Áætlanir gera ráð fyrir að heildarupphæðin gæti orðið 6,2 milljarðar króna. Að auki hafa tjónþolar borið sjálfsábyrgð vegna tjóna. Þetta kemur fram í svari viðskiptaráðherra við fyrirspurn Kristins H. Gunnarsson, þingmanns Frjálslynda flokksins, um tjón af skjálftanum.

Kostnaður vegna tjóns á mannvirkjum nemur 3,8 milljörðum.

Í svarinu kemur fram að samtals hafa borist 5723 tilkynningar um tjónstilvik. Þar af hefur verið tilkynnt um tjón á lausafé í 2451 tilvikum og 3272 tikynningar um tjón á mannvirkjum. Meðalfjárhæð tjóna á mannvirkjum var rúmar tvær milljónir.

1462 tjón á mannvirkjum eru óuppgerð. Áætlaður kostnaður vegna þeirra er 1,5 milljaður króna.