Draumariðill Xabi Alonso: Vill mæta Dönum

Xabi Alonso, fyrrum leikmaður Liverpool og nýverandi leikmaður Real Madrid og spænska landsliðsins á sér óskamótherja þegar dregið verður í úrslitakeppni HM í Höfðaborg í Suður-Afríku í dag. Xabi vill mæta Dönum.

„Ég væri mjög ánægður með að fá Danmörk úr Evrópuhópnum. Við erum búnir að mæta Dönum nokkrum sinnum og höfum alltaf haft gott tak á þeim," sagði Xabi Alonso við BT. Í draumariðli Xabi Alonso eru auk Dana, Alsír og Norður-Kórea.

Xabi Alonso hefur skorað 2 af 7 landsliðsmörkum sínum á móti Dönum en hann skoraði tvennu í 3-0 sigurleik Spánverja í vináttuleik á Parken 20. ágúst 2008. Hann hefur alls spilað 65 landsleiki fyrir Spán.