Lögregla veitir Yaris eftirför

Allavega sex lögreglubílar og að minnsta kosti eitt mótorhjól veita nú grárri Yaris bifreið eftirför á Vesturlandsvegi að sögn tveggja vegfarenda sem höfðu samband við fréttastofu. Ekki er vitað hvort um er að ræða Yaris bifreið sem stolið var í dag á Shell bensínstöð í Árbæ.

Lögregla gat ekki gefið aðrar upplýsingar en þær að verið væri að veita Toyota Yaris bifreið eftirför. Varðstjóri sagði ekki vitað hvort þetta væri hinn stolni Yaris, þetta væri allavega Yaris.

Kona búsett í Dúfnahólum hafði samband við fréttastofu og sagðist hafa séð um sex lögreglubíla veita grárri Yaris bifreið eftirför upp Fálkabakka og upp í Vesturhóla en hægt er að keyra þá götu í hring. Þrír bílar fóru því sunnan megin við Vesturhóla og þrír norðanmegin. Konan missti í skamma stund sjónar á bílunum að undanskildum einum lögreglubíl sem beið við Dúfnahóla.

Konan sá síðar Yaris bifreiðina koma á fleygiferð frá norðanverðum Vesturhólum og lögreglubíla á eftir. Yaris bifreiðin ók þaðan niður Höfðabakka og hefur líklegast farið þaðan út á Vesturlandsveg. Nokkrir lögreglubílar fylgdu bifreiðinni Höfðabakkann en aðrar fóru aftur niður Fálkabakka í átt að Reykjanesbraut líkt og viðbúið væri að ökumaður Yaris bifreiðarinnar kæmi þangað niður Ártúnsbrekku.

Bifreiðin hélt þess í stað út á Vesturlandsveg en ekki er vitað hvar bifreiðin og lögreglubílarnir eru staðsett núna en við flytjum fréttir af því um leið og þær berast.