Geta ekki valið sér eignir upp í Icesave

Hollendingar og Bretar geta ekki valið að hvaða eigum þeir ganga standi íslenska ríkið ekki við skuldbindingar sínar segir sérfræðingur í þjóðarétti. Þá eru ákveðnar eigur sem útlendingar og erlend ríki mega ekki eiga samkvæmt reglum um eignarrétt útlendinga.

Lögfræðingar og stjórnarandstöðuþingmenn, hafa lýst yfir efasemdum um Icesavesamninginn og áhrif hans á íslenskan efnahag. Hræðsluáróður segja stjórnarliðar. Harðast hefur verið deilt um hvort að samningurinn feli það í sér að allar eigur íslenska ríkisins séu lagðar að veði geti Íslendingar ekki greitt af láninu. Þórdís Ingadóttir, dósent við lagadeild Háskólans í Reykjavík og Þjóðréttarfræðingur, telur enga hættu á því.

Þórdís telur þó að gefið sé eftir með erlendar eigur íslenska ríkisins. Það sé þó ekki óhefðbundið í lánasamningum milli ríkja.

Þórdís segir að í samningunum komi fram að það fari eftir lögum þess ríkis þar sem eignirnar eru hvort og þá með hvaða hætti hægt sé að ganga að eigum íslenska ríkisins.