Loðnutorfan ekki nógu stór

Loðnan sem fannst út af Ingólfshöfða gefur því miður ekki tilefni til að gefa út kvóta á loðnuveiðar. Þetta segir Sveinn Sveinbjörnsson, leiðangursstjóri um borð í Árna Friðrikssyni. Hafrannsóknaskipið er búið að mæla loðnuna tvívegis frá því í gær og gefa báðar mælingarnar álíka niðurstöðu; að þarna séu um 100 þúsund tonn, að sögn Sveins.

Leiðangursmenn um borð í Árna Friðrikssyni mældu torfuna fyrst á svæði sem náði um 7 mílur austur af Ingólfshöfða og 15 mílur vestur fyrir höfðann. Loðnan er á hraðferð vestur með suðurströndinni og í seinni mælingunni var torfan komin um 23 mílur vestur fyrir Ingólfshöfða.

Sveinn segir að þetta hafi í raun ekki verið ein torfa heldur fleiri og hafi á köflum verið töluvert þéttar lóðningar. Þetta sé samt ekki nóg til að unnt sé að gefa út kvóta og segir Sveinn óheppilegt að búið hafi verið að skapa væntingar um slíkt. Til þess þurfa að finnast a.m.k. 400 þúsund tonn.

Hafrannsóknaskipið Árni Friðriksson heldur áfram loðnuleit en vitað er um fleiri göngur út af Austfjörðum og Suðausturlandi. Sveinn segir að þeir ráði varla einir við að mæla göngurnar og það þurfi að fá fleiri skip til þess. Segir hann í athugun að fá skip til að aðstoða við mælingarnar.

Í janúarbyrjun tóku þrjú nótaveiðiskip þátt í loðnuleitinni með Árna Friðrikssyni; Faxi úr Reykjavík, Lundey frá Vopnafirði og Börkur úr Neskaupstað, og voru sérstök tæki til slíks sett um borð í skipin.