Alþingi niðurlægt

Guðlaugur Þ. Þórðarson alþingismaður segir að þær fullyrðingar Mats Josefsson, efnahagsráðgjafa ríkisstjórnarinnar, að það kosti 85% af vergri landsframleiðslu að endurreisa bankana séu allt aðrar upplýsingar en þær sem þingið hafi fengið. Ummælin lét Josefsson falla í sænskum fjölmiðli.

Josefson sagðist þar telja að endurreisn bankakerfisins myndi kosta miklu meira en Íslendingar gerðu sér grein fyrir. Guðlaugur gagnrýndi það harðlega að þingmenn fengu upplýsingar um stöðu þjóðarbúsins í fjölmiðlum. Tók hann undir skoðun Birkis Jónssonar sem taldi að samskipti framkvæmdavaldsins við þingið væru niðurlægjandi fyrir Alþingi.

Álfheiður Ingadóttir, þingmaður VG og formaður viðskiptanefndar Alþingis, sagði við þingumræður í dag að þegar Mats hefði talað um skuldir ríkissjóðs vegna endurreisn bankanna hefði hann verið með brúttóskuldir í huga. Þær myndu lækka aftur þegar eignir bankanna yrðu seldar. Hún sagðist telja að kostnaður við endurreisn bankakerfisins yrði milli 50 og 60% af landsframleiðslu.

Hart var deilt um málið við við upphaf þingfundar í dag og kröfðust þingmenn úr stjórnarandstöðunni að boðað yrði til fundar í viðskiptanefnd.