Danski sjóliðinn bíður yfirheyrslu

Tuttugu og eins árs sjóliði af danska varðskipinu Hvítabirninum, sem liggur í Reykjavíkurhöfn, gistir nú fangageymslur og bíður þess að verða yfirheyrður vegna innbrots í Kaupþing við Austurstræti um klukkan hálfníu í gærkvöldi, þar sem hann var yfirbugaður innandyra.

Þá var hann búinn að stinga á sig miklu af hundrað króna mynt úr staukum sem hann reif upp. Hann fór mikinn inni í bankanum og var æstur en veitt lögreglunni þó ekki mótspyrnu þegar hún handtók hann. Þegar í lögreglubílinn var komið fór hann í hjartastopp en snarráður lögreglumaður beitti hann hjartahnoði og náði hjartslættinum í gang á meðan lögreglubílnum var ekið með hraði á slysadeildina, þar sem læknar tóku við manninum.

Eftir viðeigandi meðhöndlun á sjúkrahúsinu var hann útskrifaður upp úr miðnætti og fluttur í fangageymslur. Maðurinn á yfir höfði sér ákæru fyrir innbrot, þjófnað og eignaspjöll og fer svo ef til vill fyrir herrétt í Danmörku.