Uppblásin hrefna fyrir utan sendiráðið í London

Mótmælendur tóku sér stöðu við íslenska sendiráðið í London í dag til þess að mótmæla hvalveiðum Íslendinga en veiðar hefjast að nýju í dag. Þeir tóku með sér stóra uppblásna hrefnu auk þess sem kynnt var ný skoðanakönnun sem sýnir að 82 prósent Breta eru andsnúnir hvalveiðum Íslendinga.

Þá kemur fram í könnuninni að tveir þriðju aðspurðra séu reiðubúnir til þess að sniðganga íslenskar sjávarafurðir láti Íslendingar ekki af hvalveiðum í atvinnuskyni. Sverri Hauki Gunnlaugssyni, sendiherra íslendinga í London var við tilefnið afhent formlegt mótmælabréf frá samtökunum.

Að mótmælunum stóðu samtökin Campaign Whale, Environmental Investigation Agency (EIA), the International Fund for Animal Welfare (IFAW), Whale and Dolphin Conservation Society (WDCS) og World Society for the Protection of Animals (WSPA).