Útgáfustjóri las yfir póst blaðamanns

Óskar Magnússon, útgáfustjóri Morgunblaðsins, skoðaði tölvupóst blaðamanns sem hætti á blaðinu undir lok september. Blaðamannafélag Íslands hefur verið upplýst um málið.

Það verður kært til Persónuverndar.

Málið virðist eiga upphaf að rekja til þess að Ragnhildur Sverrisdóttir, umsjónarmaður sunnudagsútgáfu Morgunblaðsins, hætti í liðinni viku og sendi þá samstarfsmönnum kveðju í fjöldapósti. Sama dag birtist kveðjubréf Ragnhildar á dv.is.

Blaðamaðurinn sem um ræðir hefur ekki stigið fram undir nafni. Samkvæmt heimildum hafði Óskar Magnússon samband við blaðamanninn daginn eftir að Ragnhildur sendi bréf sitt. Mun blaðamanninum segjast svo frá að Óskar hafi sagst hafa lesið tölvupóst hans í því skyni að komast að því hver hefði sent kveðjubréf Ragnhildar úr húsi. Hafi þá Óskar jafnframt sagst hafa lesið fyrri bréf blaðamannsins og uppgötvað að hann hafi boðið DV afrit af könnun um lestur á einstaka hlutum Morgunblaðsins. Mun blaðamaðurinn hafa játað að hafa sent DV slíkt boð enda þótt hann hafi aldrei sent könnunina.

Frásögn Óskars af atburðarásinni er önnur. Ekki náðist tal af honum í gær en í samtali við mbl.is kveðst Óskar ekki hafa ætlað að afhjúpa hver hefði áframsent kveðjubréf Ragnhildar. Tilgangurinn með skoðun á tölvupóstinum hafi verið að athuga trúnaðarbrot starfsmannsins sem hafi boðið DV áðurnefnda könnun til birtingar. Póstur annarra starfsmanna væri ekki til skoðunar. Hann fagnaði því að Persónuvernd tæki málið til skoðunar.

Sigrún Jóhannesdóttir, forstjóri Persónuverndar, bendir á að samkvæmt reglum Persónuverndar sé óheimilt að skoða einkatölvupóst nema brýna nauðsyn beri til svo sem vegna tölvuveiru eða sambærilegs tæknilegs atviks.

„Þegar tölvupósts- eða netnotkun er skoðuð skal þess gætt að gera starfsmanni eða nemanda fyrst grein fyrir því og veita honum færi á að vera viðstaddur slíka skoðun," segir í reglunum.

Þóra Kristín Ásgeirsdóttir, formaður Blaðamannafélags Íslands, segir stjórn félagsins ekki hafa rætt tölvupóstsmálið formlega.

„En því er ekki að neita að ef fulltrúar eigenda lesa tölvupóst starfsmanna þá hlýtur það að setja samband heimildarmanna og blaðamanna í mikið uppnám," segir Þóra Kristín og bætir við að heimildarmenn verði að geta treyst því að trúnaður ríki milli þeirra og blaðamanna.

„Það verður því að kryfja þetta mál til mergjar og ég fagna því að viðkomandi blaðamaður ætli að kvarta til Persónuverndar og fá skorið úr um réttarstöðu sína."

Blaðamenn Morgunblaðsins munu nú bíða átekta eftir frekari skýringum yfirmanna sinna.

gar@frettabladid.is