Mestur stuðningur við Samfylkinguna - fylgi framsóknar dalar

Fylgi Samfylkingarinnar mælist nú 30,5%. Þetta er veruleg aukning frá síðustu könnun í febrúar þegar fylgi flokksins mældist 24,1%. Fylgi Framsóknarflokksins dalar nokkuð og fer úr 14,9% í febrúar í 10% nú. Þetta kemur fram í nýrri skoðanakönnun Markaðs- og miðlarannsókna, MMR.

Stuðningur við Sjálfstæðisflokk og Vinstri græna breytist lítið. Fylgi Sjálfstæðisflokks mælist nú 29,3% og fylgi Vinstri grænna 22,7%.

Fjöldi þeirra sem sagðist myndu kjósa aðra stjórnmálaflokka en buðu fram síðast heldur áfram að minnka og stendur nú í 5,3%.

Stuðningur við ríkisstjórnina mælist nú 51,3% sem er tæpum 5% minna en var í síðustu könnun.

Könnunin var síma- og netkönnun. Hvar var framkvæmd dagana 3. til 5. mars. Heildarfjöldi svarenda var 891 en þeir voru á aldrinum 18 til 67 ára og valdir handahófskennt úr þjóðskrá.