Maður reyndi að tæla stúlku í Langholtshverfi

Kynferðisbrotadeild lögreglunnar á höfuðborgarsvæðinu er með til skoðunar mál sem kom upp við Langholtsveg í Reykjavík í vikunni. Hreiðar Sigtryggsson skólastjóri Langholtsskóla sendi foreldrum bréf þar sem þau eru beðin um brýna fyrir börnum sínum að fara ekki upp í bíl hjá ókunnugum. Bréfið sendi hann í kjölfar þess að maður reyndi að tæla unga stúlku sem er nemandi í skólanum upp í bíl til sín.

Foreldri sem hafði samband við Vísi og fékk umrætt bréf sagðist uggandi yfir því að reynt hefði verið að tæla stúlku upp í bílinn í hverfinu. Hún vildi fá umræðu í gang og brýna fyrir foreldrum að vera vakandi yfir hættum sem þessum.

Björgvin Björgvinsson yfirmaður kynferðisbrotadeildar lögreglu segir málið nýkomið inn á borð til sín. Hann segir litlar upplýsingar liggja fyrir en þar sé þó lýsing á bíl og ákveðnum manni. Hann segir að maðurinn hafi ekki náð að tæla stúlkuna upp í bíl sinn.

Kynferðisbrotadeildin skoðar nú hvort önnur tilfelli hafi komið upp sem passi við lýsingu af þessum manni. Björgvin segir að ekki hafi komið upp nýleg dæmi í þessu hverfi en svona tilvik komi þó upp öðru hverju.