Icesave-samkomulag rætt á Alþingi í dag

Samkomulag um skuldbindingar Íslendinga vegna Icesave-innistæðna verður til umræðu á Alþingi í dag klukkan þrjú. Boðað hefur verið til mótmæla á Austurvelli klukkan þrjú þar sem því er mótmælt að gengið verði að samkomulaginu.

Svavar Gestsson, sem fór fyrir samninganefnd Íslendinga í málinu, segir í viðtali við Morgunblaðið í dag að Icesave samkomulagið sé innan þolmarka fyrir íslendinga og að með því sé Íslandi komið í skjól í sjö ár í miðri kreppu. Í viðtalinu segir hann enn fremur að átökin um Icesave hafi reynt mjög á EES-samninginn, sem hann segir að hafi skolfið og nötrað á tímabili.