Fluttu í leit að betra lífi

Ung fjögurra manna fjölskylda flutti úr landi í morgun í von um betra líf í Noregi eftir að hafa gefist upp á samskiptum við banka sinn. Fjölskyldan réði ekki við greiðslubyrði sína og segir bankann hafa hafnað eina kaupandanum sem vildi taka yfir lánin. Formaður Hagsmunasamtaka heimilanna segir athugandi fyrir bankana að endurskoða veðsetningarreglur í ljósi ástandsins.

Hjónin eru á þrítugsaldri og eiga tvo drengi, þriggja og fjögurra ára.

„Bankinn á okkur í dag," sagði fjölskyldufaðirinn þegar fréttastofa ræddi við hann í gærkvöldi, nokkrum klukkustundum áður en fjölskyldan hélt út á Leifsstöð. Hann er málari, hún útskrifaðist sem grunnskólakennari í gær og hefur unnið sem slíkur.

Saman keyptu þau rösklega 100 fermetra blokkaríbúð í Hafnarfirði árið 2007 á 24,2 milljónir króna og fengu til þess lán upp á tæpar 19,4 milljónir. Það hefur síðan hækkað um fjórar milljónir. Þau voru með tvo bíla á bílaláni, þar af einn á myntkörfuláni.

Þau hættu að borga í fyrra og segjast hafa haft samband við lögfræðideild Glitnis þegar stefndi í óefni. Þar hafi þeim verið ráðlagt að tala við Ráðgjafastofu heimilanna, sem hafi lagt til að þau seldu íbúðina gegn yfirtöku skulda að viðbættum vanskilum. Fasteignakaupendur eru sjaldséðir hrafnar þessa mánuðina og enginn svo mikið sem hringdi fyrr en tilboð kom 3. apríl upp á þau býtti að taka yfir lánið og vanskilum verði breytt í lán á sömu kjörum.

En þá neitar bankinn - á þeim forsendum að komið sé yfir veðhæfni og að til séu greiðsluerfiðleikaúrræði. Þá var unga parið búið að gefast upp, hann kominn með vinnu í Noregi og þau ekki reiðubúin til að borga áfram af lánum sem voru komin umfram verðmæti íbúðarinnar.

Fjölskyldufaðirinn segir meðferðina á þeim fáránlega, en viðurkennir þó að bera ábyrgð á eigin vanskilum.

Fasteignasali fjölskyldunnar furðar sig á þessari meðferð málsins, nú tapi bankinn, fjölskyldan og þjóðarbúið. Íbúðin fari líklega á nauðungarsölu og fjölskyldufaðirinn sennilega lýstur gjaldþrota.

Formaður Hagsmunasamtaka heimilanna segir ríkar ástæður fyrir bankana að endurskoða veðsetningarreglur.