Yossi notaði legköku úr manneskju

Yossi Benayoun hefur greint frá því að legkakan sem var notuð þegar hann fór til Serbíu í óhefðbundna meðverð vegna meiðsla sinna hafi verið úr manneskju en ekki hesti.

Legkökunudd serbnesku konunnar komst fyrst í fréttirnar þegar Robin van Persie, leikmaður Arsenal, greindi frá því að hann myndi fara þangað vegna meiðsla sinna.

Síðan var greint frá því að Liverpool hafi sent þá Benayoun, Glen Johnson, Albert Riera og Fabio Aurelio einnig til Serbíu svo þeir gætu einnig fengið legkökunuddið góða.

Talsmaður Liverpool hélt því fram að legkökurnar sem hafi verið notaðar í nuddinu væru úr hestum.

En Benayoun staðfesti í samtali við enska fjömiðla að í hans tilfelli hafi legkakan sem notuð var komið úr manneskju.

„Læknirinn hefur haft marga leikmenn til meðferðar hjá sér," sagði Benayon. „Hún útskýrði allt fyrir mér áður en meðferðin hófst og sagði mér að hún myndi nota vökva úr legköku frá konu."

Benayoun sagði að engar sprautur hafi verið notaðar. „Það fór ekkert inn í vöðvann sjálfan. Þetta snerist um að nudda vökvanum á svæðið þar sem meiðslin voru."

„Þetta gerði það að verkum að ég gat spilað og hjálpað mínu liði innan tveggja vikna frá meiðslunum," sagði Benayoun en upphaflega var búist við því að hann yrði frá í fjórar vikur. Hann skoraði jöfnunarmark Liverpool gegn Manchester City um helgina en leikurinn fór 2-2.