Mótmælendur farnir

Örlagaríkum mótmælum í miðborg Reykjavíkur lauk um þrjúleytið í nótt. Tveir lögreglumenn slösuðust alvarlega í mótmælunum eftir að múrsteinum var kastað í þá. Nokkrir eru lemstraðir, samkvæmt upplýsingum frá lögreglu. Ekki hafa fengist upplýsingar að svo stöddu um það hvers eðlis meiðsl þeirra eru. Voru sumir mótmælendur á tímabili farnir að slá skjaldborg um lögreglumenn til að varna því að grjóti yrði kastað í þá.

Lögreglan beitti táragasi í fyrsta sinn í sextíu ár og var táragasi varpað á mótmælendur um það bil tíu sinnum. Mótmælendur gerðu ítrekaðar tilraunir til þess að kveikja elda fyrir utan Stjórnarráðið skömmu áður en mótmælunum lauk en lögreglan slökkti þá jafnharðan.