Misstu allt sitt í bruna

 „Það er ekki beint burðugt á okkur ástandið núna. Við eigum enga peninga, engin föt og þar fram eftir götunum. En svona er lífið. Helst af öllu viljum við finna köttinn okkar, hann Ingólf, aftur, en honum týndum við í öllum látunum þegar eldurinn kom upp,“ segir Phillip Krah, sem ásamt Maju Feierabend, unnustu sinni, og Mark Hymøller, vini þeirra, leigðu íbúð í húsi við Klapparstíg sem varð eldi að bráð aðfaranótt 16. janúar síðastliðinn. Þau höfðu flutt inn í íbúðina fjórum dögum fyrir eldsvoðann.

Þremenningarnir búa þessa dagana á gistiheimili Hjálpræðishersins, en þar fengu þau einnig inni fyrsta mánuðinn eftir að þau fluttust til Íslands í byrjun október. Í millitíðinni störfuðu þau Phillip og Maja á sveitabýli nálægt Selfossi, en nú vinna þau öll á veitingastöðum í höfuðborginni.

Að sögn Phillips hafði parið undirbúið flutninginn hingað til lands í rúmt ár, en þau ólust bæði upp í litlu þorpi nálægt borginni Hildburghausen í miðhluta Þýskalands. Mark á hins vegar rætur sínar að rekja til Sønderborg í Danmörku. „Það hafði lengi verið draumur okkar að búa á Íslandi. Þetta er frábært land og náttúrufegurðin einstök. Svo kunnum við vel að meta íslenska popptónlist og það minnkaði ekki löngunina,“ segir Phillip og hlær.

Hann viðurkennir að hafa orðið lafhræddur þegar hann var vakinn og sagt að eldur væri laus í húsinu. „Við höfðum rétt svo tíma til að grípa vegabréfin okkar og svo þurftum við að hlaupa út úr húsinu. Allt sem við áttum brann, líka reiðufé sem við höfðum fengið í laun frá veitingastaðnum, því við höfðum ekki stofnað bankareikning á þeim tíma. Nú er bara að vona að hagur okkar vænkist á næstunni.“

Kettinum Ingólfi kynntist Phillip og Maja á sveitabýlinu þar sem þau unnu og tóku hann með sér til Reykjavíkur. „Okkur fannst svalt að nefna þennan frábæra kött eftir manninum sem fyrst settist að á Íslandi. Hann fannst ekki eftir brunann og við erum viss um að hann er enn á lífi. Við söknum hans mjög mikið og vonum að hann finnist sem allra fyrst,“ segir Phillip, og biður lesendur sem gætu hafa orðið varir við Ingólf að hafa samband í síma 862-9498.

kjartan@frettabladid.is