Guðlaugi afhent bænaskjal 70 prósent Hafnfirðinga

Velunnarar St. Jósefsspítala afhenda Guðlaugi Þór Þórðarsyni, heilbrigðisráðherra, tæplega 14 þúsund undirskriftir, eða 70% kosningabærra Hafnfirðinga, síðar í kvöld vegna fyrirhugaðrar lokunar spítalans.

Tilkynnt var í byrjun árs að St. Jósefsspítali verði lagður niður og megnið af starfsemi hans flutt til Keflavíkur. Meltingarsjúkdómadeild verður flutt á Landsspítala.

Gunnhildur Sigurðardóttir, einn af vel velunnurum spítalans, segir að forsvarsmenn félagssamtaka í Hafnarfirði og áhugafólk um framtíð spítalans hafi hist og ráðið ráðum sínum eftir að tilkynnt var um lokunina. Í framhaldinu var ákveðið að boða til borgarafundar. Þangað mætti Guðlaugur og á annað þúsund Hafnfirðingar. Einnig fundaði hópurinn með þingmönnum kjördæmisins. Að lokum var ákveðið að hefja undirskriftasöfnunina.

Gunnhildur segir að yfir 70% kosningabærra Hafnfirðinga hafi ritað nöfn sín á undirskriftalistanna. Í bæjarfélaginu búi tæplega 25 þúsund manns, þar um 18 þúsund með kosningarétt, en rúmlega 14 þúsund undirskriftir hafi safnast.