Vilja að boðað verði til stjórnlagaþings

Síðar í dag verður hleypt af stokkunum undirskriftarsöfnun á vefsíðunni www.nyttlydveldi.is. Þar gefst þjóðinni kostur á að skora á Alþingi að samþykkja að boða til stjórnlagaþings, nýjan þjóðfund.

,,Hlutverk þess þings verði að semja nýja stjórnarskrá þar sem lagður verði grunnur að nýju lýðveldi m.a. með skýrri aðgreiningu löggjafarvalds, dómsvalds og framkvæmdavalds og með gagngerri endurskoðun á kosningareglum til Alþingis," segir í tilkynningu sem Ólína Þorvarðardóttir þjóðfræðingur og Njörður P. Njarðvík rithöfundur skrifa undir.

,,Að áskoruninni stendur hópur Íslendinga sem telur brýnt að hefjast nú þegar handa við að endurreisa traust í samfélaginu og efla virðingu fyrir reglum lýðræðis og grundvallarstofnunum samfélagsins."