Hvatti Ingibjörgu til að íhuga stjórnarslit með sms-i

Svanfríður Jónasdóttir, bæjarstjóri í Dalvíkurbyggð, hvetur Ingibjörgu Sólrúnu Gísladóttur, formann Samfylkingarinnar, til að íhuga stjórnarslit og skoða með opnum hug tilboð Framsóknarflokksins um að verja minnihlutastjórn Samfylkingar og Vinstri grænna vantrausti. Þetta kemur fram í smáskilaboði sem bæjarstjórinn sendi fyrir mistök á símanúmer sem er keimlíkt númeri formannsins.

Svanfríður segir afar óheppilegt að Geir H. Haarde, formaður Sjálfstæðisflokksins, tali fyrir hönd Samfylkingarinnar og vísi í samtal sitt við Ingibjörgu. Geir sagði við fréttamenn í Valhöll í gær að hann hefði rætt við Ingibjörgu og formennirnir væru ekki á því að slíta stjórnarsamstarfi flokkanna.

Svanfríður sendi eftirfarandi smáskilaboð í gær:

„Mjög óheppilegt að Geir tali fyrir okkur og vísi í samtal við formann S. Best að gefa út yfirlýsingu að þú munir gefa álit að höfðu samráði þegar þú ert komin heim. Ástandið mjög alvarlegt og staða S einnig. Skoða tilboð framsóknar jákvætt. Kveðja og knús Svanfríður."

Svanfríður staðfesti í samtali við Fréttastofu að hún hefði sent þetta sms.