Breskir fjölmiðlar þakka lopapeysurnar

Breskir fjölmiðlar fara hlýjum orðum um staurblanka Íslendinga sem hafi sent heilan gám af lopapeysum, treflum, leistum og húfum til aldraðra Breta sem hrynji niður af kulda.

Talsmaður félags aldraðra í Bretlandi segir við ITN sjónvarpsstöðina að þarna sé sýndur stórkostlegur hlýhugur á sama tíma og Íslendingar eigi í miklum efnahagsörðugleikum.

Dagblaðið The Sun segir að þrátt fyrir að Ísland sé gjaldþrota hafi góðhjartaðir Íslendingar ekki hikað þegar þeir voru beðnir um að hjálpa öldruðum Bretum.

Vitnað er í Heimi Karlsson sem stýrir Íslandi í bítið ásamt Kolbrúnu Björnsdóttur. Heimir segir að þau hafi ekki trúað eigin eyrum þegar þeim var sagt að aldraðir Bretar dæju úr kulda.

Því hafi þau hrint þessari söfnun af stað og viðbrögðin verið frábær.